Ambalama - සැබැ සමාජ කතිකාවක සොඳුරු නවාතැන්පල

April 2012

ශ්‍රි ලංකාව වෙනුවෙන් මිත්‍යා දෘශ්ටික - සම්‍යක් දෘශ්ටික දෙවියෝ ගැටෙති !!!!

ඉන්දියානු කපුවන් ශ්‍රි ලංකාවට එරෙහිව මලායලි ගුරුකම් කොට භූම් බන්ධනයක්ද කර ඇති බවක් සී නිවුසිය කියා සිටී . එහි කියැවෙනා හැටියට නම් ආශ්චර්යය උදාකරගැනීමට බාධාවක් වී තිබෙන්නේද මේ ගුරුකම්ය . ඒ නිසා කෙසේ හෝ මේ ගුරුකම් වල බල බිඳ දැමිය යුතුය . මේ ගැන අදහස් දක්වන විෂ්ණු දේවාල කපුවෙක් කියා සිටින්නේ ජනතාව ආගමට දහමට නැඹුරු කර  ගුරුකම් වල බලය බිඳ  දැමිය හැකි බවය . පොර ඒවා කියන්නේ කෙලින්ම දෙය්යන්ගෙන් අසාගෙන නිසා ඇත්තක් තිබිය හැකි වුවත් කියනා තරම් ලේසියෙන් ජනතාවගේ ආගම් බක්තිය වැඩි කල නොහැක . කලත් සැහෙන කලක් ගත වීමට ඉඩ ඇත . එතෙක් කාලයක් බලාසිටිය හොත් අපිට ආශ්චර්යය ලබාගන්නට ද  දිගු කාලයක් බලා සිටීමට සිදුවනු ඇත . අර්ධ මිත්‍යා දෘෂ්ටික , හින්දු භක්තික විෂ්ණු දෙවියන්ගෙ උපදේස් ක්‍රියාත්මක කරනවාට වඩා ඉක්මන් , ඵලදායි ක්‍රියාමාර්ගයක් අප සතුව ඇත . ඒ හරහා ඉක්මනින් ප්‍රථිපල ලබාගෙන ආශ්චර්යය කරා ගමන් කල හැකිවාක් මෙන්ම මලයාලි ගුරුකම් වලට සම්බන්ධ මිත්‍යා දෘශ්ටික දේව සභාවේ විෂ්ණු දෙවියන්  විසින් ලබාදෙන 'වැරදි ' උපදෙස් ක්‍රියාත්මක කර කෙලවා ගැනීමේ අවදානමද ඉවත් වේ

කලින් ඡේදයේ සඳහන් කලාක් මෙන් මලයාලි ගුරුකම් හා සම්බන්ධව කටයුතු කරන්නේ මිත්‍යා දෘශ්ටික දේව සභාවේ හින්දු දෙපාර්ථමෙන්තුවේ මිත්‍යා දෘශ්ටික දෙවි වරුන් විසිනි .  ඒ  නිසා ඔවුනට විරුද්ධව කටයුතු කිරීමේ වඩාත් සාර්ථකම ක්‍රමය වන්නේ සම්‍යක් දෘශ්ටික දේව සභාවේ සහය ලබාගැනීමයි . ජාතියේ පිනට පහල වු  අපේ මහාචාර්ය තුමා  සහ සම්‍යක් දෘශ්ටික දේව සභාවේ නායක නාථ දෙවියන් අතර ඇති සමීප සබඳතාව  මෙහිදී අපගේ වාසියට යොදාගැනීමට හැකියාවක් ඇති බව අපි අමතක නොකල යුතුය . මිත්‍යා දෘශ්ටික දේව සභාවේ වඩාත් ප්‍රභල දෙපාර්ථමෙන්තුව වූ සර්ව බලධාරි දේව අංශය සමඟින් නිරන්තරයෙන් ගැටෙනා නාථ දෙවියන්ට හින්දු දෙපාර්ථ මෙන්තුව සමඟින් ගැටීම ඉතාම පහසු කර්තව්‍යක් වන අතර අප විසින් ඒ සඳහා එතුන්ව පෙලඹවීම අර්බුධය වඩාත් පහසුවෙන් සමනය කරගැනීමට මහත් පිටුවහලක් වනු ඇත . මේ සඳහා සමස්ථ රට වැසියාම ආගමික කටයුතු වලට යෙදවීමේ අවශ්‍යතාවයක් නොමැත . අපගේ පින්වත් මහාචාර්ය තුමාට 'රාජ්‍ය - අනුග්‍රහය ' සහිතව භාවනාකිරීමේ ඉඩ පහසුකම් සලසා දීම පමනක් සැහේ . නාථ දෙවියන්ට ජය වේවා !!!! මිත්‍යා දෘශ්ටික දෙවියන් භංග වේවා !!!! . වැසිකිලි ඉන්දියාව භංග වේවා !!!!!  ශ්‍රි ලංකාවට ජය වේවා !!!!!!!

ප.ලි - අධිවේගය ගිලා බහිනවාලු ! සමහරවිට ඒකත් භූමි බන්ධනය නිසාද දන්නේ නෑ

අපි නොදන්න අවුරුදු ක්‍රිඩා

2012  සිංහල -හින්දු අලුත් අවුරුද්ද උදාවීමට ඇත්තේ පැය කිහිපයකි . සියලුම සිංහලයන්වත් සියලුම හින්දුන්වත් මේ උත්සවය සමරන්නේ නැති වුවත්  අලුතින් නම් සොයනවාට වඩා පහසු නිසා  පොදු භාවිතයම යොදා ගැනීම  වඩා හොඳය . මුණු පොතේ එක එකා ටැග් කරන ෆොටෝ වල ටැග් ගැලවීමත් , බතික් සරම් ගහගෙන ගැමි කම ගැන පොර ටෝක් දෙන "විද්වතුන්ගේ" බයිලා අසා සිටීමත් එපා වී ඇති නිසා මේ ලියා තබන්නට සැරසෙන්නේ අවුරුදු උත්සවය හා බැඳි ඇති  අවුරුදු ක්‍රිඩා කිහිපයක්  අවුරුද්දේ පමණක් නොව මුලු වසර පුරාම මේ ආශ්චර්ය්‍යද්වීපයේ දකින්නට ලැබෙනා හැටි ගැනය







සැඟවුනු අමුත්තා 

සැඟවුනු අමුත්තා බොහෝ අවුරුදු උත්සවයන්හි දක්නට ඇති තරඟයකි . ක්‍රිඩාවක්ම නොවුනත් පුංචි පහේ වින්දනයක් ඇති වැඩකි . මෙහි ඇති අපූර්වත්වය නම්  'සැඟවුනු අමුත්තා' යැයි කිවාට අදාල අමුත්තා හැංගි මුත්තං කෙලියකදි මෙන්  සැබවින්ම සැඟවී සිටින්නේ නැති වීමය . ඔහු අවුරුදු උත්සවයට සහභාගිවන  අනෙකුත් පිරිස අතරම  රැඳි සිටින , එවැන්නෙක් සිටිනවා යැයි කවුරුත්  දන්නා චරිතයකි . එනම් ඉන්න බව දන්න , ඉන්න තැන දන්න ඒත් අල්ලා ගැනීමට අපහසු චරිතයකි

මේ ආකාරයේ සැඟවුනු අමුත්තන් අවුරුදු  නොතිබුනත් දකින්නට ඇත . එක්කෙනෙක් ඉන්නේ ආශ්චර්ය දීපයෙන්  පිට සුපිරි  ඉස්පිරිතාලයකය . ඉස්පිරිතාලයේ නමත් හැමෝම දන්නවාය ,ඒ නැතත් නිවාඩු ගන්න දීපු වෛද්‍ය සහතිකයෙන් ඉස්පිරිතාලය සොයාගන්නට පුලුවන්ය . ඒ වුනාට පොලිසියේ මහත්තුරු කියන්නේ ඉන්නා තැනක් දන්නේ නැ කියලාය  . ඉන්න රටයි , ඉස්පිරිතාලයයි දෙකම  දන්නවාය නොදන්නේ රූම් නම්බර් එක විතරය , කෙහෙල් කැනක් කැපු  හොරෙක්ගෙන්  කැන් 10ක් හොරෙන් කැපුවා කියා කට උත්තර ගන්නා පොලෝසියට රූම් නම්බර් එකක් හොයා ගන්න බෑය කිව්වාමත් විලි ලැජ්ජය , කොහොම වුනත් හැමෝම දන්නා කියන , ඉන්න  තැනත් දන්න අමුත්තා පොලෝසියට 'සැඟවුනු අමුත්තෙක්' වෙලාය

තවත් සැඟවුනු අමුත්තන් ජාතියක් ආශ්චර්ය්‍යද්වීපයෙ ඉන්නවාය . ඒ අය එන්නේ සුදු පාට වෑන් වලය .දැන සැහෙන කාලයක ඉඳන් එනවාය , උස්සන් යනවාය . සමහරුන් ඉස්සුවා විතරය ඊට පස්සේ  වෙච්ච දෙයක් නැය , තවත් සමහරක් කට්ටියක්ව  ගුවන් තොටුපලෙන් රටපටවනවාය , තවත් කෙනෙක් ගෙන් ප්‍රශ්න ටිකක් අසා කියන තැනකින් බස්සලා යනවාය . තවත් සමහරුන්ව උස්සාගෙන යන අතරමඟදී එන ටැලිපෝන් කෝල් නිසා නිදහස් කරනවාය . කොහොමින් හෝ සුදු වෑන් කාරයිනුත් සැඟවුනු අමුත්තන්ය . ඉන්නා බවක් දන්නවාය , කරන්නේ මොනවද කියලාත් දන්නවාය ,එන්නේ කොහෙන්ද කියා.......|සුදු වැන් අමුත්තන්ව ගෙදර ගෙන්නා ගැනීමට අවශ්‍ය නැති නිසා කපා දමන ලදී | ... ඒ වුනාට කාටවත් අහුවෙන්නේ නෑය


අලියාට ඇහැ  තැබීම සහ කඹ ඇදිල්ල

අලියාට ඇහැ  තැබීම සහ කඹ ඇදිල්ල අනාදිමත් කාලයක සිට පැවත එන අවුරුදු ක්‍රිඩාය (මම දන්නා තරමින් ) , තවමත් අවුරුදු උලෙල වල ඔය සෙල්ලම කෙරෙන්නේ පරණ විදිහටම වුනත් අනෙකුත් දවස් වලට රටේ සිද්ධ වෙන්නේ පොඩ්ඩක් වෙනස් විදිහටය . කොටින්ම දැන් අලියාට ඇහැ තැබිල්ලක් ඇත්තේම නැත . කරන්නේ අලියාගේ යසට තියන කැලි ටිකත් ගලවා දැමීම පමණය , අලියාගේ කැලි ගලවන ගොන් අලි රෑන සෙට් වෙන්නේම කඹ ඇදිල්ලටය . මේ කඹ ඇදිල්ලෙත් කෙලවරක් නැය ඔහේ දෙපැත්තට ඇද ඇද ඉන්නවා විතරය . ලබන මැයි පලවෙනිදා ට  නියම ඇදිල්ලක් බලා ගන්න පුලුවන්ය . එක් කට්ටියක් කොලඹටත් අනික් කට්ටිය යාපනයටත් කඹය අදින කොට වැඩියෙන් ඇදෙන්නේ කෝහේටද කියා බලාගත හැකිය . කවුරු කොහේට වැඩියෙන් ඇද ගත්තත් කඹ ඇදිල්ලෙන් දිනන්නේ මැද මුලනේ අම්පයර් මහත්තයා විතරය ! මුන් දෙගොල්ලම පරාදය !


කණා මුට්ටි සෙල්ලම 

කණා මුට්ටි සෙල්ලමද සැහෙන්න පරණය , ඇස් දෙක බැන්දත් ඉව සහ හොඳ කනක් තියන එකාට මුට්ටියට නෙලීම එතරම් අමාරු නැය .  අවුරුදු උත්සව වල කෙරෙන විදිහ එසේ වුවත් රටේ එදිනෙදා සිදුවෙන්නේ ඔය සෙල්ලමේ කණපිටය . එහිදී ඇස් බැඳ ගෙන ඉන්නේ නිකන්ම නිකන් හිස් මුට්ටි බවට පත්වී ඇති දේශප්‍රේමී ජනතාවය , මුට්ටියට නෙලන දේශපාලුවන් ඉන්නේ හොඳින් ඇස් කන් ඇරගෙනය . ඒ නිසා තරඟකරුවන් සියලු දෙනාම ජයග්‍රහාකයෝය , නිතිපතා කුඩුවෙනා මුට්ටි පමනක් පරාජිතයෝය


ගම හරහා දිවීම

ගම හරහා දිවීමද අවුරුදු උත්සව වල ප්‍රධාන සහ අනිවාර්යතම අංගයක්ය . මෙහිදි  මුල්තැන ලැබෙන්නේ දුවන උන්ටත් වඩා සපෝටර්ලාටය . ත්‍රිවිල් , මෝටසයිකල් වලින් වට  කරගත් සැබැවටම දුවන එකෙක් දැක ගන්නවත් අමාරුය . මන්ද සපෝර්ටලාගෙන වැහිලාය . කොටින්ම දුවනවාට වඩා තියෙන්නේ බොරු   ෂෝ එකය , අනෙක් ගම්වල උන්ට  දුවනා බවක් පෙන්නීමය . අවුරුදු කාලෙන් පිටතදී මේ සෙල්ලම කරන්නේ කබර -රාල අන්කල්ය . පත්තරේ ඇඩ් දම දමා කියන්නේ අපේ ආර්ථිකය රේස් එකේ දුවනවා කියාය , කලාපයෙන් එක වෙලාලුය , ලෝකයෙන්ම දෙක වෙලාලුය කියලාය . ඒ වුනාට  දුප්පතාට තියා මධ්‍යම පාන්තිකයාටවත් එහෙම ගතියක් පෙන්නට නැය , ඒත් ඉලක්කම්  ලොකු නිසා අනික් උන්ට පේන්න ෂෝ එක නම් තියනවාය .

 විවිධ මාධ්‍ය හරහා දුටු දේ ඇසුරෙන් ලියා තැබුවේ 'අපි නොදන්න අවුරුදු ක්‍රිඩා ' කිහිපයක් ගැනය , ඔබටත් තව තව ඒවා මතක් වීමට ඉඩ ඇත .ඒවා පහලින් ලියා තබනවා නම් අගනේය . කිව්වා කියා අමුත්තක් නොවුනත්  ශ්‍රි ලංකා වාසි  සියලු දෙනාටම  කිරියෙන් පැනියෙන් ඉතිරෙන නව වසරක් උදා වේවා  කියා  බුවා විසින් ප්‍රාර්ථනා කරන සිටිනවාය . බ්ලොග් කරුවන්ගේ සිහින බක්මහ උලෙලත් අති සාර්ථක වේවා කියා පතනවාය . සංවිධායක මණ්ඩලය දේශප්‍රේමීන් නම් මේ පාර  ඇමරිකන් පිටි වලින් හැදු බනිස් කැම නම් සිහින බක් මහ උලෙලෙන් ඉවත් වෙලා තිබෙන්නට පුලුවන්ය !

Related Posts Plugin for WordPress, Blogger...
Back to Top