මාලිගාවෙ උලු නම් කුඩෙ කුඩු , ඊලඟට තල්මසුන්ගෙ හකු ?? - අවසන් පූර්ව වටයට කලින් බුවාගේ විග්‍රහය

සිංහ පැටවුන්ගෙ සුපිරි ජයග්‍රහනයත් එක්ක බුවාගේ අනාවැකි 4න් තුනකුත් ගොඩගියා . පැවැත්වුන තරඟ ගැනත් ඉදිරි තරඟ ගැනත් , මෙවර ලෝක කුසලානය එක්ක බැඳුන තවත් කාරණා කිහිපයක් ගැනත් තමයි අද ලියන්න හදන්නෙ .

අර්ධ අවසන් පූර්ව වටය 

ලෝක කුසලානය ගැන මුල ඉඳලම ලිපි ලිව්වත් මේ වටය ගැන තමයි මුලින්ම අනාවැකියක් ඉදිරිපත් කලේ ඔක්කොම හරි නොගියත් එයින් 3ක් හෝ හරි ගිය එක ගැන සතුටුයි .

 පකිස්ථානය හා කොදෙව්වන් අතර තරඟය නම් මේ වටයේ තරඟයක ලක්ෂනය නොගත් එක නම් කණගාටුයි . දඟ පන්දු යවන්නන් හමුවේ කොදෙව්වන්ගෙ පිතිකරනයෙ තිබුන දුර්වල තාවය තමයි මේ තරඟයෙ අවාසනාවන්ත තත්වයට හේතු උනේ .

ඉන්දු ඕස්ට්‍රෙලියා තරඟය බලාපොරොත්තු උන විදිහටම ඉතාම හොඳ තරඟකාරී ස්වභාවයක් ගත්තා. ලෝකයේ හොඳම කණ්ඩායම් දෙක තරඟ වදින කොට වෙන මොනව බලා පොරොත්තු වෙන්නද ? කොහොම උනත් සුරේෂ් රේනා කණ්ඩායමට එක්කරගැනීමත් බොහෝ විචාරකයින් පැවසු විදිහට වෘත්තීය දඟ පන්දු යවන්නෙක් කණ්ඩායමට එක් කරගැනීමට පිති කරුවෙක් අයින් නොකිරීමත් නායකයා විදිහට දෝනිගෙන් මේ ජයග්‍රහනයට ලැබුන මූලිකම දායකත්වය කියල කියන්න පුලුවන් . ඒ වගේම තමන්ගේ පන්දු යවන්නන් භාවිතයෙදි දෝනි ඉතාම හොඳ දක්ෂතාවක් දැක්වුවා කියලත් කියන්න පුලුවන් . ඉන්දියාවට සුභ පතන්න වෙනමම ලිපියක් ලියපු නිසා ඒ ටික අතහරිමුකො . අවසාන වශයෙන් මේ තරඟයෙදි ඉන්දියානු පන්දු යවන්නන් දැක්වූ දක්ෂතාවන් පවත්වාගන්න එක ඉන්දියානු කණ්ඩායමට ඉදිරි තරඟ වලදි ඉතා වැදගත් කියන එක කියන්න ඕනි

තුන්වෙනි තරඟය අවසන් වුනේ ගොඩ දෙනෙක් නොහිතපු විදිහට . මගේ අනාවැකියකුත් බොරු කරගෙන . ක්‍රිකට් තරඟාවලි වලදි දක්ෂතම කණ්ඩායමට වඩා අවස්ථානුකූලව දක්ෂතා පෙන්නන අයට ඉදිරියට යන්න අවස්ථාව ලැබෙනවා කියන එකට මේක හොඳ උදාහරණයක්.පිතිකරනය හා පන්දු යැවීම කියන අංශ දෙකෙන්ම තර්කානුකූලව බැලුවාම ඉදිරියෙන් ඉන්න ද: අප්‍රිකාව එදා පිතිකරනයේ යෙදුන විදිහ නම් ඉතාම කණගාටුදායකයි . කොහොමින් හරි ක්‍රිකට් වලට තර්ක වැඩක් නැය කියල ඔප්පු කරමින් නවසිලන්තය ජයගත්ත . ඒ වගේම මම මුල්ම ක්‍රිකට් ලිපියෙත් ලිව්ව වගේම දකුණු අප්‍රිකානුවන්   නැවතත් වතාවක් ලෝක කුසලානයක් තුලදි අසාර්ථක උනා.අවසන් 4 දෙනාට පැමිනේවිය කියල ගොඩ දෙනෙක් බලාපොරොත්තු උන ඕස්ට්‍රෙලියාව හා ද:අප්‍රිකාව කලින්ම ඉවත් උනත් ඒ කණ්ඩායම් දෙකම ඉතාම දක්ෂ කණ්ඩායම් බව නම් කියන්න ඕනි . ශ්‍රි ලංකාව පැත්තෙන් නම් ද: අප්‍රිකාවට වඩා නවසිලන්තයට මුහුන දෙන එක පහසුයි කියලයි මම හිතන්නෙ

අවසන් තරඟය ශ්‍රිලාංකික ක්‍රිඩා ලෝලීන් අමන්දානන්දයට පත්කල තරඟයක් . තරඟාවලිය තුලදි දෙවෙනි වතාවටත් ලකුනු 200 ඉක්මවුන සම්බන්දතාවයක් ගොඩ නඟන්න සමත් උන දිල්ශාන් හා තරංග තරඟාවලියෙ හොඳම ආරම්භක පිතිකරු යුගලය බව නැවතත් සනාත කලා . මේ වටය තුලදි කඩුලු 10 ක පරාජයක් කියන්නෙ බටහිර ඉන්දියාව ලැබූ පරාජය වගේම පරාජයක් ඒත් එංගල්න්ත ක්‍රීඩකයින් තරඟය පුරාවටම  දැක්වූ සුහද ශිලි  විලාසය නම් අගය කලයුතුමයි මාලිංගගේ දරුණු යෝකර් පන්දුවට මුහුන දීල හිනාවකින් මාලිංගත් එක්ක කතා කිරීම , වැරදුන දිල් ස්කූප් එකට පොඩි අත්පුඩියකින් හා සිනාවකින් සංග්‍රහ කිරීම , පිත්ත අතින් අතැරුන දිලශාන්ට දක්වපු ප්‍රතිචාරය , තරංගගේ ශතකය වෙනුවෙන් දිල්ශාන් අමුතු ආකාරයේ ආරක්ෂක පියවර වලට යත්දි දක්වපු ප්‍රතිචාරය වගෙ දේවල ඔවුන්ගේ මේ උසස් ගතිගුණයට නිදසුන් . මේ බව වඩාත් හොඳින් කැපී පේන්නෙ කලින් තරඟයෙදි ඕස්ට්‍රෙලියානුවන් ඉන්දියාවට දක්වපු ප්‍රතිචාර ත් එක්ක සසංදනය කලාම . කොහොම උනත් තමන්ගෙ හොඳම පිතිකරුවාත් පන්දු යවන්නත් නොමැතිව එංගලන්තය මෙ ආපු දුරත් ඇතිය කියලයි මම හිතන්නෙ

අවසන් පූර්ව වටය

ශ්‍රි ලංකාව හා නවසිලන්තය අතර පැවැත්වෙන අවසන් පූර්ව වටයේ පලමු තරඟය කවුරුවත් බලාපොරොත්තු උන එකක් නෙවෙයි . මොකද නවසිලන්තයට මෙතරම් දුරක් එන්න ලැබෙවිය කියල ගොඩ දෙනෙක් හිතුවෙ නැහැ . කොහොම උනත් ඒ නිසාම ශ්‍රි ලංකා කණ්ඩායමට හිතුවාටත් වඩා මේ තරඟය පහසුවෙන්න ඉඩ තියෙනව . මොකද නවසිලන්ත කණ්ඩායම දඟපන්දු යවන්නන් ඉදිරියේ ඉතාම අසරණ බව කලින් පැවැත්වුන ශ්‍රි ලංකා නවසිලන්ත තරඟයේදී පේන්න තිබුනා. . ඒ වගේම ශ්‍රි ලංකා කණ්ඩායම ප්‍රේමදාස ක්‍රිඩාංගනයේදී ලකුණු හඹා යැමෙදී උනත් ගැටලුවක් ඇති කරනොගන්න බව පේන්න තියනව .කොහොම උනත් නවසිලන්ත කණ්ඩායමට විටෝරිගේ එකතු වීමත් , මුරලිදරන් ආබාධ තත්වයත් සමහර විට ලංකාවට ප්‍රශ්නයක් වෙන්න පුලුවන්. ඒත මට හිතෙන විදිහට පන්දු රැකීමෙදි සිදු කරපු අඩු පාඩු හදාගෙන ක්‍රිඩා කිරීමෙනුත් හා  සංගා , ,මහේල තරඟවලිය පුරාම දක්වපු දක්ෂතා ඒ විදිහටම දැක්වුවොත් ලංකාවට අවසාන තරඟයට යන්න පුලුවන් කරදරයක් නැතුවම 

ඉන්දියාව හා පකිස්ථානය අතර පැවැත්වෙන දෙවෙනි අවසන් පූර්ව තරඟය මෙවර ලෝක කුසලානයේ සුවිශීම තරඟයක් බවට පත්වෙයි . මොකද නොසිතූ විරූ දක්ෂතා දක්වපු පකිස්ථානයත් , තරඟවලියේ තවත් සුපිරි දක්ෂතා දක්වපු කණ්ඩායමක් වන ඉන්දියාවත් තරඟ වදින නිසා . කොහොමටත් ඉන්දියා - පකිස්ථාන තරඟ ඉතාම උණුසුම් ස්වභාවයක් ගන්නා නිසා බොහෝ දෙනෙකුගෙ අවධානය මේ තරඟයට යොමුවෙලා තියනව .ඉන්දියාවේ අගමැති තුමත් පකිස්ථානයේ නායකයිනට තරඟය නරඹන්න කියල ආරධනා කරල තියනව කියල ආරංචියි , යම් විදිහකින් මේ රාජ්‍ය නායකයොත් තරඟය බලන්න ආවොත් ඒක කණ්ඩායම් දෙකටම ප්‍රභල මානසික පීඩනයක් වෙන්න ඉඩ තියනව . තමන්ගෙ රටේදීම පකිස්ථානයට පැරදේවිය කියන එකත් , එහෙම උනොත් ඉන්දියානු ප්‍රෙක්ෂකයින් කුපිත වේය කියන එකත් නිසා ඉන්දියානු කණ්ඩායමට දැනෙන පීඩනය වඩාත් වැඩි වේවි.තරඟය පැවැත්වෙන මොහාලි ක්‍රිඩාංගනය පකිස්ථානයට ඉතාම ආසන්න ව පිහිටලා තියන නිසා දේශගුණයේ හෝ පිට්ටනියේ වෙනස් කමක් එතරම් තදින් පකිස්ථානුවන්ට බලපාන එකක් නැහැ .ඒ වගේම මේ ක්‍රිඩාංගනයෙ ඉන්දියාව හා පකිස්ථානය අතර අවසනායට පැවති තරඟය ( 2007 දි ) ජය අරගෙන තියෙන්නෙත් පකිස්ථානය , ඒ ඉන්දියාව ගත්ත ලකුණු 322 ට පිලිතුරු විදිහට ලකුණු 323 ක් අරගෙන  ඒ නිසා පකිස්ථානයට හොඳ ආත්ම විශ්වාසයකින් තරඟ බිමට එන්න පුලුවන් .අනෙක් අතට පිතිකරුවන්ට වඩා වාසි සහගත මොහාලි තනතීරුව වඩාත් ප්‍රභල පිතිකරුවන් ඉන්න ඉන්දියාටවට වාසි සහගතයි කියල හිතන්න පුලුවන් . ඒ වගේම මේ තරඟවාලිය පුරාවටම දක්ෂතා පෙන්වපු යුවරාජ් ගේ ක්‍රිඩා දිවියෙ ආරම්භක ක්‍රිඩාංගනය වෙන්නෙ මොහාලි. ඒ නිසා මේ පිට්ටනිය තුල ඔහුගේ සාර්ථකත්වය තවත් වැඩි වේවිය කියල හිතන්න පුලුවන් . ඒත් එක්කම මේ දක්වා ලෝක කුසාලාන තරඟයකදී ඉන්දියාව පරාජයට පත්කරන්න පකිස්ථානයට අවස්ථාවක් ලැබිලා නැහැ කියන එකත් ඉන්දියානුවන්ගේ ආත්ම විශ්වාසය වැඩි දියුණු කරන්න හේතුවේවි . පකිස්ථානයට වාසි සහගත කරුණු කාරනා තිබුනත් , තරඟය කොතරම් තියුනු උනත් අවසානයෙදී ජය ඉන්දියාවට හිමිවේවිය කියල මම හිතනව , සචින්ගේ හෝ යුවරාජ් ගෙන් දිගු ඉනිමක දායකත්වයක් ලැබුනොත් ඒක වඩාත් පහසුවෙවි

ඉදිරි වටය ගැන අනාවැකි ඔන්න ඔහොමයි ,බලමු මොකද වෙන්නෙ කියල නේ

මෙතෙක් තරඟයේ දුටු තවත් දේවල්

විශේෂඥ විස්තර විචාරකයින්ගේ ප්‍රකාශ , තිරණ ගොඩාක් දුරට අසාර්ථක වෙන බවක් මේ පාර පේන්න තිබුන , ජයග්‍රාහී කණ්ඩායම් , කණ්ඩායම් වල සංයුතිය , තණ්තීරු වල හැසීරීම වගේ ගොඩක් දේවල් ගැන මේ අය කියපු දේවල් වැරදුනා . දවස් ගනන් කාලකණ්නි විදිහට ගහපු ක්‍රිකට් ක්‍රිඩාව මොහොතින් මොහොත හදගැස්ම වැඩි කරවන් ක්‍රිඩාවක් දක්වා පත්වුන වෙනස් වීම සමහර පැරණි ක්‍රීඩකයින් නිවැරදිව ග්‍රහනය කරගෙන නොමැති වීම මේකට හෙතු වෙන්න පුලුවන් . මේ අය අතරින් ටෝනි ග්‍රෙග් මහත්තය නම් මේ නවීන තත්වයන්ට අපුරුවර හැඩ ගැහිල ඉන්නව . ඒ නිසාම එයා කියන බොහොමයක් දේවල් අනික් අයට වඩා සාර්ථකයි

මේ විචාරකියින්ම කරපු චෝදනාවක් ගැන කතාකරන්නත් මම කැමතියි , චෝදනාව එල්ල උනේ ඉන්දියාවට උනත් යම් විදිහකින් පසුපෙල ශක්තිමත් උනා නම් අපිටත් එල්ල වෙන්න ඉඩ තිබුන චෝදනාවක් මෙක . ඒ තමයි රසිකයින් වෙනුවෙන් සෙල්ලම් කිරීම වැරදිය කියන් එක , ඒ කියන්නෙ රසිකයින් ප්‍රිය කරන දැවැන්ත ප්‍රහාර වලට යැම අවශ්‍ය දෙයක් නෙවෙයි , රටේ ජයග්‍රහනය උදෙසා පමනක් සෙල්ලම් කල යුතුයි කියන එක 

බැලු බැල්මට නම් කතාව ඇත්ත වගේ පෙනුනත් මෙතන සැඟවුන කතාවක් තියනව .ඒ තමයි ක්‍රිකට් ක්‍රිඩාව ලබල තියන විභූතියට ප්‍රාධානතම හේතුව රසිකයින්ය කියන එක . ක්‍රීඩකයිනට විතරක් නෙවෙයි ඔය විචාරක මහත්තුරුන්ට පවා බොහොම සුව පහසුවට ඉන්න ලැබිලා තියෙන්නෙ රසිකයින් නිසා . මේ තත්වය ඉන්දිවෙදි( අනිකුත් දකුණු ආසියානු රටවල්දිත් ) ගොඩක් වැඩියි . ලෝකෙ දියුණු රටවල ක්‍රිකට් ක්‍රිඩකයින්ටවත් නැති තරු ස්වාභාවයක් මෙ අයට රසිකයින්ගෙන් ලැබිලා තියෙන්ව .ලෝකයම බලන ක්‍රිකට් තරඟාවලියේ අනුග්‍රාහකියින් විදිහට ඉන්දියාවට (හෝ කලාපයට ) පමනක් අදාල හීරෝ හොණ්ඩා හා රිලායන්ස් සමාගම් ඉදිරිපත්වෙන්නෙත් ඒකයි , ඉතින් එතරම් තිරණාත්මක නැති තරඟයකදි රසිකයින් බලාපොරොත්තු වෙන ප්‍රහාරාත්මක පිතිකරනයකට යන එක වැරදිද ? ලකුනු සාමාන්‍ය 35 ටත් වැඩි පිතිකරුවන් 7 දෙනෙක් ඉන්න ඉන්දියානු  කණ්ඩායම හැම තරඟයකදිම යන්තම් 250 ක් 260 ක් ගහගෙන දිනනව විතරක් නම් ඒ රටේ රසිකයො කැමතිද ? 

අපේ කණ්ඩායමෙත් ජයසූරිය හරි ඒ වගෙ වෙනත් ප්‍රහාරකයින් කිහිප දෙනෙක් හරි හිටියනම් අපිත් අපේ කණ්ඩාය්මෙන් හොඳ ලකුනු ගානක් බලාපොරොත්තු වෙනව . සමහරවිට අපේ අයත් ඒ වගෙ තත්වයක්දි රසිකයින් වෙනුවෙන් ප්‍රහාරාත්මක පිති හරඹයකට යන්න ඉඩ තියනව .එහෙම උනා නම් අපටත් මෙ චෝදනාව එල්ල වේවි . 

ඉතින් අපට නැතත්  ඉන්දියාවට වගේම පකිස්ථානු නායක සහිඩ් අෆ්‍රිඩිටත් මේ අය කරන මේ චෝදනාව සාධාරනද ??? 

මේ තරඟවලිය සම්බන්ද විකාශන කටයුතු වලදි ත් වෙනදට වඩා අපුරු සිද්ධීන් , වැඩසටහන් හා දැන්වීම දකින්න ලැබුනා.ලංකාවෙ විකාශය කටයුතු කරන චැනල් අයි නාලිකාවෙ ෆැන් ටෝක් විශේෂාංගය, ස්ටාර් ක්‍රිකට් නාලිකාවේ හර්ෂා හා සීක් පොරගේ (මට නම ඩයල් නැ ) අපූරු කතාබහ , ක්‍රිකට් ක්‍රීඩකයින් ගේ ආවෙනිකත්වයන් පාදක කරගත් පෙප්සි දැන්වීම .ඉන්දියාවෙ ජයග්‍රහනය පතා නිර්මානය කෙරුණ හවුස්ෆුල් කණ්ඩායමේ දැන්වීම මේ අතර තියනව .

මේ අතරින් පෙප්සි දැන්වීමේ තිබුන දේවල් ඒ විදිහටම  කරන්න නම් ක්‍රිඩකයින්ට බැරි උනා. පීටර්සන් ට තරඟයට එන්න ම බැරි උනා , හරිබජන් දුස් රා දැම්මත් කඩුලු ලබා ගත්තෙ නැහැ , දිල්ශාන් ගහපු එකම ස්කූප් එකත් අසාර්ථකයි , දෝනි නම් හෙලිකොප්ටර් ශොට් එකට සැහෙන කාලෙකින් ගිහින් නැ (හැබැයි පුහුනු තරගෙදි නම් ගැහුවා ) , ශෙවාග් කොච්චර නෙලුවත් ඌපර් කට් ද මොකක්ද එකට යනව නම් මම දැක්කෙ නැ . ඒ කියන එව්වා ඒ විදිහට කලෙ අපේ මාලිංගත් , බිලී බවුඩන් අම්පයර්තුමත් විතරයි :D

මෙවර ලෝක කුසලාන්ය ගොඩක් ක්‍රීඩකයින්ට පෞද්ගලිකව වැදගත් වීමත් විශේෂිත දෙයක් ඒ අතර සචින් හා මුරලි ඉදිරියෙන්ම ඉන්නවා . ඊට අමතරව ගොඩක් ක්‍රීඩකයින් විවිධ ලකුණු සීමා කඩයිම් වලට ලඟාවීම  මේ තරඟාව ලියෙදි සිදුවුනා . එ වගේම ක්‍රිකඩ් ක්‍රිඩාවෙ දැවැන්තයින් බොහොමයක් දෙනෙක්ගේ අවසන් ලෝක කුසලානය මෙය විය හැකියි . සචින් , මුරලි, පොන්ටින්, මිශ්භා උල් හක් , යුනිස් ඛාන් , බ්‍රෙට් ලි, ජැක් කලිස්, ශොහිබ් අක්තාර් , සහීර් ඛාන් වගේම සංගක්කාර , මහෙල , දිල්ශාන්ටත් එහෙම වෙන්න පුලුවන් ( ලංකාව ආදේශක හොයාගත්තොත් ) 

ඒ කිව්වෙ දැක්ක විශේෂතා ගැන , අවසාන වශයෙන් ලියන්න හදන්නෙ ලෝක කුසලාන තරඟාවලිය අවසානයෙදී සම්මානයට ලක්වෙන් අය ගැන අනාවැකියක් සහ මට හිතෙන තවත් සම්මාන කිහිපයකට සුදුස්සන් , මේව ගැන ඔබේ අදහසත් කමෙන්ට් කරන කොට දාන්න 

සාර්ථකම පිතිකරු - ඉන්දියාව අවසන් තරඟයට ගියොත් සචින් නැත්නම් සංගා

සාර්ථකම පන්දු යවන්නා - පකිස්ථානය අවසන් වටයට ගියොත් සහිඩ් අෆ්‍රිඩි නැත්නම් සහීර් ඛාන්

හොඳම තුන් ඉරියව් දක්ෂතා - යුවරාජ්

තරඟාවලියේ වීරයා -අවසන් තරඟ ප්‍රතිපලය අනුව  දිල්ශාන් හෝ යුවරාජ්

හොඳම නායකයා - සංගා හෝ දෝනි

ශිලාචාරම කණ්ඩායම - එංගලන්තය 

අශිලාචාරම කණ්ඩායම - පකිස්ථානය / ඕස්ට්‍රෙලියාව

අශිලාචාරම ක්‍රිඩකයා -  සහිඩ් අෆ්‍රිඩි, ශෝන් ටේට්, ඊලඟ තරගෙන් පස්සෙ සමහර විට හරිබජාන්

ඉදිරි බලාපොරොත්තු සහිත නවක කණ්ඩායම - අයර්ලන්තය 

ඉදිරි බලාපොරොත්තු සහිත නවක් ක්‍රීඩක - ජෝජ් ඩොක්ට්‍රෙල් (අයර්ලන්තය )

ඔන්න ඔහොමයි මට හිතෙන්නෙ . අවසන් තරඟයට කලින් තවත් ක්‍රිකට් ලිපියකින් මුනගැහෙමු .ක්‍රිඩාශිලි සතියක් හැමොන්ටම

අපේ සිංහ පැටවුන්ට ජයවේවා!!!!!!!